| تبليغات | X |
شینک
اسماعیل امیری
1992ءِ گرماگ
- " چشیں شینک ھر روچ ھست انت ۔ اے نوکی سیھ جمبرے نبیت و بَشّی رگاماں پَر تو ایر ندنت ۔"
- " تو وَہ ھنچو گپّءَۓ کھ گشئے پر ما اللھءِ درستیں دَر بند بیتگ انت ۔"
- " توبھ توبھ ! من کدی چو گشت ؛ بلۓ من گشاں وھدیکھ واجھ ھدا وتی رحمتاں ریچیت ، گڑا نئیکھ گوں اے شینکءَ ۔ بلکیں جمبرے بندیت ، گرندے توار کنت ، گروکے شھم دنت ، و ۔ ۔ ۔ " ۔
- گڑا ، زاناں چے تئی ھیالءَ واجھ ھداءِ دستءَ دیر بیت کھ ھمے شینکءَ جمبرے بکنت و پر ما راہ بدنت " ۔
- " بے شک ، ھچ کار چھ آییءِ دستءَ دیر نبیت ؛ بلے تو چھ کجا زانئے ؟ ھر وھد شینکے یا پُٹوے ظاھر بیت ، گڑا تو مردمءَ پھ آرامءَ نَیل ۓ ؛ ھیّا کن ات کھ ھورءَ شما را گپت ۔ پَئیری ھم ھنچو تو ما را نھ اشت کھ وتی درستیں نھ ششتگیں گداں بیاراں و یکپارگی بشودان اش ۔ ایش انت مرچی پدا گرنچے منی سرءَانت " ۔
- " وۓ تو وہ گشئے جنگءَ لانک بستگ ۔ ۔ ۔ "۔
- " من جنگءَ لانک نھ بستگ بلے اے توئے کھ ھر روچ مئے گوش ات کرّ کتگ انت ۔ یکّے وہ اے گرمءِ جلءَ چاتءِ سرا روگ کوھیں جگرے لوٹیت ، پدا کمیٹانی ھُلکاپگ ، گدانی شودگ و ھیرانانی مُشگ ۔ ھنچو سھبءَ چَمّ کھ پچ بنت گوں اے شومّیں چاتءِ ھیالءِ آیگءَ مردم چھ زندءَ بیزار بیت ۔ آپی اگاں وشّ ات ھم دردے پھ دو ۔ ۔ ۔ " ۔
- " تو پئیریگیں گپّءَ کن ئے ۔ پئیری وہ من باز امیدوار اتاں ۔ بلے تو پریات و زاریءَ لگّ ات ئے کھ گرمءَ مارا کشت ۔ من ترا گشت کھ اے ھورءِ گرمی انت ۔ ۔ ۔ " ۔
- " گڑا کجا بیت انت تئی ھار و نوک آپ " ۔
- " نگبھت ھورءَ نھ گورت ، ھار چھ کجا کئیت " ۔
- " گڑا من ھم ھمیشیءَ گشگءَ یاں ، وھدیکھ جمبرے نیست گڑا ھور چھ کجا گواریت " ۔
- " من زاناں کدی گشتگ کھ چھ صافیں آسمانءِ دیمءَ ھور رچیت یا ملائک ترمپاں زیرنت و کاینت ، تئی کوزّگ و منجلاں پُرّ کننت " ۔
- "گندئے منی ھبرءِ سرا آتک ئے ۔ پمیشا من گشاں کھ پھ چشیں شینک مینکاں دلءَ وشّ مکن "۔
ماھتون و سومریءِ گپ اے باروءَ دنیگھ ھلاس نبیتگ اتنت کھ چاتءِ سرا رست انت ۔ چونائیا اے اولی بر نھ ات ، مدام آھاں اے باروءَ گپّ کت ات ۔
- ماھتونءَ وتی کمیٹ ترپّگءَ دور دات و لوھیگ بنءَ ایر کت انت و درّائینت: " ھاں ! جنکاں ،مرچی چات چون انت ؟ "
- " سروں سیر انت کھ زاماتوں کلیر انت "۔ یکّے وہ سوریں آپ و پدا کمیٹءَ ھر چے بجن ئے بلے پُرّ بیگءِ نامءَ نزانت " ۔ سومریءَ وار ندات کھ دگھ کسے ماھتونءِ پسّوءَ بدنت ۔
- " چاتے کھ سالانی سرا روپگ مبیت ، گڑا چد و شرتر وہ نبیت ۔ ھبرءَ ھچّ کسی دپ نھ اڑیت بلے کارءِ باریگءَ بے بلاھے گشئے تپءَ گپتگ انت۔ مرادءَ گوستگیں ماہءَ ، دو سَپت و دو ساد تیار کتگ ات و دگھ دو سئے ساد اشی و آییءِ گورا درآتک ات بلے مئے مردیناں گشئے ، ھر یکّے پھ یک گورے و یک ھبرے ۔ ۔ ۔ " ۔
- " ھبر دو نبیت ، مرادءَ اے کار کت ؛ گرانکءِ پتءَ چو گشت ۔ ۔ ۔ " ۔
- " گرنچءَ بُنءَ ایر کن ، یک برے دمءَ پُرّ کن ، رندا کمیٹءَ ایر دئے ۔ چھ کارءَ پیش تو وتا را گوں جاکءِ جنگءَ توسین ئے "۔
- " ھو ، ساد ھمودا سدیت کھ بارگ ترانت ۔ شینکءِ گپّ من بنگیج کت یا تو۔۔۔"۔
- " شرّانت ، بیا کمیٹءَ ایر دئے کھ دیر بیگءَانت " ۔
- " منءَ بلّ ، تو وتی لوھیگاں پرّ کن و برو ۔ ۔ ۔" ۔
- " شرّ ، من وتی لوھیگاں پرّ کنان و رواں ؛ دراھیں روچءَ چاتءِ سرا وہ نھ ننداں ۔ بلے اشیءَ بزان کھ اے تئی وتی تاوانءَانت " ۔
- " ھنچو بھ کشّ بیچارگیں گوات ، ھما سھبیگین انت کھ پھکا بند بیتگ ۔ ۔ ۔"۔
- " منی ھیالءَ اے زرگوات انت ۔ اے موسمءَ ، زرگوات ھورءِ مستاگءَ دنت ۔ ۔ ۔ " ۔
- " منی ھیالءَ تو دگھ کارے نھ کن ئے بلے ناکو چارشنبھءِ روزیگءَ بند کن ئے" ۔
- " روزیگ ھر کسی اللّھءِ دستءَانت ۔ ۔ ۔" ۔
- " چو وہ ھو ، بلے نی کھ تو پیشن گوئیءَ لگّ اتگ ئے ، باندا تو دَم جنگ و امپاس کنگءَ بنگیج کن ئے ، گڑا ناکو چارشنبھءِ گورا کئے رَوت " ۔
- " من ھچبر نھ گشتگ کھ منءَ چشیں کرامات ھست و نئیکھ من چشیں ھبرے کت " ۔
- " تو ھنّی نھ گشت کھ اے زرگوات انت و ھَور کاریت ؛ گڑا تو اشیءَ چون زان ئے " ؟
- " اشیءَ من پمیشا گشاں کھ من و ترا گوں ھور ، اے دگھ مردم ھم گواتءِ کشّگءَ مارگءَانت ۔ اے مئیگ و مئے پیرینانی تجربھ انت کھ چشیں موسمءَ ، زرگواتءَ مستاگے الّمءَ گون بیت انت " ۔
- " اے تئی زرگوات ھورے بیاریت وہ سکّ شرّانت ، ھشکیں لوڑے میاریت و مھ رَوت " ۔
- " نگبھت بید چھ نا امیتیءَ دگھ ھبرے تئی دپءَ در نئیت ۔ بیا اے منجلءَ گِر گوں ۔ بدار ،بدار ، منی ھیالءَ اے شینک بزتر بیان انت ۔ جنکاں ! شما
بچارات باریں " ۔
ماھتونءَ چمّ آسمانءَ سکّ کتگ اتنت ۔
- " ھو ، گشئے بَزتر بیتگ " ۔ گرانک و شلی کھ وتی ھیراناں مشگءَ اتنت ، دمانے دست اش داشت و آسمانءِ نیمگا چارات اش ۔
- " نی چیّا اوشتاتگ ئے ، زیت کن برو تا کھ ما ھم وتی کارے بکنیں ! وتی لوھیگ ای پُرّ کت انت ، ما را ھما انت ھبرءَ داشتگ ای ۔ ۔ ۔ " ۔
ماھتونءَ وتی منجل سرءَ کت انت و رَہ گپت ۔ سومریءَ وتی چمّ چست کتانت
و دلءِ تھا گشتی : " شینک گشئے بَزتر بیان انت ۔ ۔ ۔ "
