| تبليغات | X |
اے ھپتگءَ منی نبشتانکءِ بدلءَ ، مسکان بلوچءِ دلءِ پاھار پھ شما ندرانت۔ اگاں شما ھم لوٹ ات کھ شمئے ھمے وڑیں گال و نبشتانک ماں "بلوچی مئے وتی شھدیں زبان انت" ءِ دیم ءَ شنگ ببنت ، پھ من اے نشانیءَ راہ اش دئیت۔
اسماعیل امیری
تپتان دوت کنت
چھ عھد و زمانگاں ،
چھ ھزار و سدیاں ساری
چھ بازیں پیڑیاں پیش
نزاناں چھ کدین و تا کد
سُچیت جبین و
دوت کنت تپتان ۔
"کاینت منءَ یات
آ گپ و گالاں
آ ماہ و سالاں"
تپتان ءِ دامنءَ سبزگ ات
ھیرتانی تردّگ ات
میش و بُز گلانی دودگ ات
لوکانی دریپّگ ات
ڈاچیانی دنزگ ات
شیراش چھ ماھگاں شنزگ ات
ھینزکانی منتگ ات
دوگ و سمبارءِ نوشگ ات ۔
" وش اتنت آ دور بلوچانی
تاب دیگ ڈالشاھیں بروتانی
چکگ و چکاسگ سگارانی"
مالدارانی لڈ و بوج ات
جوپاگ و ھامین ات
پیر و ورنا شاد ات
بلوچ ڈیھ آباد ات،
کاینت من ءَ یات
گشتگ جمالدینی آزات
"آ گپّ و گالاں آ ماہ و سالاں
پیش ءِ بلوچ انت رند چاکری انت
ھر جا روانت آ ملک اش وتی انت
ترسے ندارانت وت بادشاہ انت
شپ روچ روانءَ منزل جنان ءَ
کاینت منءَ یات
رنجاں بنت زیات"
بلوچ ءِ پلّیں آبند ءَ ،
مان رتک انت گوباز
ٹگ و موچڑیں رپکباز
جت اش جنگانی ساز
ملک مئے کت اش آوار
آدرہ برنجی کشار
ماش گوں پرماشاں
تنگھیں گلھ و ارزن
ھیکی لپاشت انت۔
یلیں ورنا سرمچاریں
راجی سردار کنگریں
چو کڑبی ڈل ات انت
تیگاں تیزیناں
ایرنشت انت تیرکوہ
ڈوبر ءَ تپتان ءِ ۔
بلے بزان کھ ،
"چھ ابد بیتگ تا ازل مانیت"
تپتان نبیت ایرماد
بلوچ ءِ ڈیل و بالاد
نجنت جوکاں ۔
تپتان دوت کنت،
آسگوار بیت پھ بدیگاں
دری زورآور و شومّیں لدیگاں ۔
ندر پما روچ ءَ ،
تپتان شور کنت
مُچّاں ھور کنت
درپشیت سھیل
وتواجھی ءِ
وت مستری ءِ ۔
تپتان دوت کنت
تپتان دوت کنت
دلگوش : من شاعرے نیاں ، اے گال منی دل ءِ پاھارانت۔
مسکان بلوچ
اپریل 2007
