| تبليغات | X |
تو بگش
من كجام دردَي تانجوان ماران تو بگش
گم جتين زردَي كسّوان كاران، تو بگش
يك گمي بوجيت، آ دگه بندنت كوكري
دان كدي رنجَي دامنا داران ، تو بگش
په تيي رنج و په تيي دردان داتگين
دارو و درمان چه كجا بياران ، تو بگش
يكبري ماتي تو منا امبازان بزير
ابوري بابي ، په ترا گاران ، تو بگش
مَي اميت گُدي ، آسري ديوان ات تيي
ني كجام سر تلّان ترا چاران ، تو بگش
ماريان برزين نشتگ و گپتاران جنَی
چون ترا درد انت په مَی واران ، تو بگش
سرپدَی وت كه چه وتي كردان زاهرين
كَی ادا سوچيت دنگر و داران ، تو بگش
دم كنَی وهدی منّهان سارتين گام په گام
كَی ببارت ديرين منزلی باران ، تو بگش
ای مني تيكي چيزّكی پربند انت ، علي
بی نپين گالان په كيا شاران ، تو بگش
علي بكش دشتياري
